ਤਾਜਾ ਖਬਰਾਂ
ਹਰਿਆਣਾ ਦੇ ਝੱਜਰ ਜ਼ਿਲ੍ਹੇ ਵਿੱਚ ਮੰਗਲਵਾਰ ਦੇਰ ਸ਼ਾਮ ਇੱਕ ਭਿਆਨਕ ਸੜਕ ਹਾਦਸਾ ਵਾਪਰਿਆ, ਜਿਸ ਨੇ ਪੰਜ ਪਰਿਵਾਰਾਂ ਨੂੰ ਸੋਗ ਵਿੱਚ ਡੁਬੋ ਦਿੱਤਾ। ਸਿਲਾਨੀ ਪਿੰਡ ਨੇੜੇ ਰਾਤ ਕਰੀਬ 8 ਵਜੇ ਪਰਾਲੀ ਨਾਲ ਲੋਡ ਇੱਕ ਤੇਜ਼ ਰਫ਼ਤਾਰ ਟਰੱਕ ਅਚਾਨਕ ਬੇਕਾਬੂ ਹੋ ਗਿਆ ਅਤੇ ਸਾਹਮਣੇ ਤੋਂ ਆ ਰਹੀ ਇੱਕ ਕਾਰ ’ਤੇ ਪਲਟ ਗਿਆ। ਟਰੱਕ ਦੇ ਭਾਰ ਹੇਠ ਕਾਰ ਪੂਰੀ ਤਰ੍ਹਾਂ ਦਬ ਗਈ, ਜਿਸ ਕਾਰਨ ਕਾਰ ਵਿੱਚ ਸਵਾਰ ਪੰਜੋਂ ਲੋਕਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਅਤੇ ਐਮਰਜੈਂਸੀ ਟੀਮਾਂ ਤੁਰੰਤ ਮੌਕੇ ’ਤੇ ਪਹੁੰਚ ਗਈਆਂ। ਕਾਰ ਟਰੱਕ ਅਤੇ ਪਰਾਲੀ ਹੇਠ ਪੂਰੀ ਤਰ੍ਹਾਂ ਫਸੀ ਹੋਣ ਕਾਰਨ ਬਚਾਅ ਕਾਰਜ ਕਾਫ਼ੀ ਮੁਸ਼ਕਲ ਬਣ ਗਿਆ। ਜੇਸੀਬੀ ਮਸ਼ੀਨ ਦੀ ਮਦਦ ਨਾਲ ਪਹਿਲਾਂ ਕਾਰ ਨੂੰ ਪਰਾਲੀ ਹੇਠੋਂ ਬਾਹਰ ਕੱਢਿਆ ਗਿਆ ਅਤੇ ਫਿਰ ਕਾਰ ਦੇ ਉੱਪਰਲੇ ਹਿੱਸੇ ਨੂੰ ਕੱਟ ਕੇ ਲਾਸ਼ਾਂ ਨੂੰ ਬਾਹਰ ਕੱਢਿਆ ਗਿਆ। ਲਗਭਗ ਇੱਕ ਘੰਟੇ ਤੱਕ ਚੱਲੇ ਬਚਾਅ ਅਭਿਆਨ ਦੇ ਬਾਵਜੂਦ ਕਿਸੇ ਨੂੰ ਵੀ ਬਚਾਇਆ ਨਹੀਂ ਜਾ ਸਕਿਆ।
ਮ੍ਰਿਤਕਾਂ ਦੀ ਪਛਾਣ ਕਾਰੋਬਾਰੀ ਘਣਸ਼ਿਆਮ ਕਿਸ਼ੋਰ (55), ਵਾਸੀ ਪਿੰਡ ਸੁਰਹਾ, ਜਨਾਰਦਨ ਵਰਮਾ (45), ਵਾਸੀ ਤਵਰਪੁਰ ਪਿੰਡ, ਆਜ਼ਮਗੜ੍ਹ (ਉੱਤਰ ਪ੍ਰਦੇਸ਼), ਅਖਿਲੇਸ਼ (30) ਅਤੇ ਜੈਵੀਰ (22), ਵਾਸੀ ਬਿਜੇਤਾ ਕਾਜ਼ੀ ਪਿੰਡ, ਸੰਭਲ ਜ਼ਿਲ੍ਹਾ, ਅਤੇ ਪਿੰਕੂ ਵਜੋਂ ਹੋਈ ਹੈ, ਜੋ ਇਸ ਸਮੇਂ ਦਿੱਲੀ ਗੇਟ ਇਲਾਕੇ ਵਿੱਚ ਰਹਿੰਦਾ ਸੀ।
ਜਾਣਕਾਰੀ ਅਨੁਸਾਰ ਘਣਸ਼ਿਆਮ ਕਿਸ਼ੋਰ ਸ਼ਟਰਿੰਗ ਇੰਜੀਨੀਅਰ ਸੀ ਅਤੇ ਉਟਲੋਧਾ ਪਿੰਡ ਵਿੱਚ ਪ੍ਰੀਤ ਸ਼ਰਮਾ ਦੇ ਘਰ ਠੇਕੇ ’ਤੇ ਕੰਮ ਕਰ ਰਿਹਾ ਸੀ। ਮੰਗਲਵਾਰ ਸ਼ਾਮ ਕੰਮ ਮੁਕੰਮਲ ਕਰਨ ਤੋਂ ਬਾਅਦ ਉਹ ਚਾਰਾਂ ਮਜ਼ਦੂਰਾਂ ਨੂੰ ਕਾਰ ਰਾਹੀਂ ਦਿੱਲੀ ਗੇਟ ਵੱਲ ਛੱਡਣ ਜਾ ਰਿਹਾ ਸੀ। ਚਾਰੇ ਮਜ਼ਦੂਰ ਝੱਜਰ ਸ਼ਹਿਰ ਦੇ ਡਾਬਰਾ ਮੰਦਰ ਨੇੜੇ ਸਿਲਾਨੀ ਗੇਟ ਖੇਤਰ ਵਿੱਚ ਰਹਿੰਦੇ ਸਨ। ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਝੱਜਰ ਜਨਰਲ ਹਸਪਤਾਲ ਭੇਜ ਦਿੱਤਾ ਗਿਆ ਹੈ।
Get all latest content delivered to your email a few times a month.
